Staff, PJ Obispo

Isinulat ni Prince Obispo

Dumagundong ang panawagan na wakasan na ang kabi-kabilang korapsyon ng mahigit 5,000 kasapi ng komunidad ng UP na nagsagawa ng malawakang walk-out bilang pakikiisa sa Black Friday Protest na pinangunahan ng UP Diliman University Student Council (USC), UP Act Against Corruption Network (UP ACTION) at UP Multisectoral Alliance (UP MSA) nitong Biyernes, Setyembre 12 sa UP Diliman. 

Pinangunahan ni Fiona Fuentes, CSSP Representative to the USC, ang lokal na programa para sa mga mag-aaral ng CSSP, Economics, Eduk, CBA, SLIS, at Arki sa Gonzales Hall (Main Library). Binatikos niya ang pahayag ni Marcos Jr. na dapat mahiya ang mga pulitikong patuloy na nangungulimbat sa kaban ng bayan. Aniya, “Dapat si Marcos Jr. ay mahiya rin”.

Bukod pa rito, binigyang diin ni Fuentes ang panawagan para sa mas mataas na badyet sa edukasyon at pagpapahalaga sa karapatan ng mga estudyante sa libre, aksesible, at ligtas na pag-aaral. 

“Napakaraming mga building na hindi tapos, ang mga construction inabot na ng dekada at hindi pa rin natatapos. Pero ang gobyerno, budget cut doon, budget cut dito. Ano ang sabi nila? Mamuhay raw ng payapa at wag mag rally, paano hindi magrereklamo kung ganito ang estado ng mga estudyante? Habang sila, nilulustay nila ang pera, saan? Sa 28 na luxury cars?” Giit niya.

Matatandaan na nananatiling hindi pa rin tapos ang matapos-tapos na mga gusali sa loob ng pamantasan gaya na lamang ng CAL Faculty Center at ang mga renobasyon sa Palma Hall, na siyang mga kolehiyong lunsaran ng mga required General Education (GE) courses. Dahil rito, nananatiling kulang ang mga sa pang-akademikong espasyo tulad ng klasrum at mga tambayan na tahanan ng mga organisasyon sa unibersidad. [RELATED: 𝗕𝘂𝗱𝗴𝗲𝘁 𝗰𝘂𝘁𝘀 𝘄𝗼𝗿𝘀𝗲𝗻 𝘁𝗵𝗲 𝘀𝘁𝗮𝘁𝗲 𝗼𝗳 𝗦𝗨𝗖𝘀 — 𝗔𝗻 𝗶𝗻𝘀𝗶𝗱𝗲 𝗹𝗼𝗼𝗸 𝗮𝘁 𝘁𝗵𝗲 𝗽𝗲𝗿𝘀𝗶𝘀𝘁𝗲𝗻𝘁 𝗹𝗮𝗰𝗸 𝗼𝗳 𝗮𝗰𝗰𝗲𝘀𝘀𝗶𝗯𝗹𝗲 𝘀𝘁𝘂𝗱𝗲𝗻𝘁 𝘀𝗽𝗮𝗰𝗲𝘀 𝗶𝗻 𝗨𝗣 𝗗𝗶𝗹𝗶𝗺𝗮𝗻’𝘀 𝗖𝗦𝗦𝗣

“Magsusumbong ka ba kung magnanakaw ang pangulo mo? Magsusumbong ka ba kung ang pulis mo ay nananakit at pumapatay ng mga estudyante?” ani Fuentes. 

Bukod sa taun-taong budget cuts SUCs, patuloy rin ang pagtaas ng presensya ng mga armadong pwersa ng estado sa pamantasan. Sa 2026 National Expenditure Program (NEP), 21 bilyong piso ang tinaga mula sa mungkahing pondo para sa UP System na 46.8 bilyong piso. Samantalang ayon sa Kabataan Partylist, nananatiling mataas ang pondo para sa korapsyon, pasismo, at agresyon na nakalaan sa confidential funds at mga ahensya ng gobyerno tulad ng PNP at AFP.

Sa parehong araw, namataan ang presensya ng Quezon City Police District at AFP sa magkaibang lokasyon ng unibersidad. Kinabukasan, naiulat din ang presensya ng mga armadong kapulisan sa tapat ng Acacia Residence Hall at UP Shopping Center. Patunay ito ng patuloy na paglakas ng banta sa kaligtasan dahil sa pagtaas ng presensya ng kapulisan sa pamantasan nito ring mga nagdaang buwan.

[CONTEXT: Ugnayang Tanggol KAPP Report on Police Sighting; Ugnayang Tanggol KAPP Report on AFP Sighting; Armed Police Sighting]

Matapos ang inilunsad na programa ay ang pag-anunsyo ng Philippine National Police (PNP) ng polisiyang “No Permit, No Rally,” bilang tugon sa nakaambang mas malawak pang mobilisasyon sa EDSA Shrine at People Power Monument noong Setyembre 13, at sa paparating na ika-53 na anibersaryo ng Batas Militar sa Setyembre 21, 2025.

Hamon ni Fuentes sa mga Iskolar ng Bayan na maging matatag laban sa estadong mapanupil at ipagpatuloy ang pagpapalakas ng mga panawagan upang kalampagin ang mga nasa gobyerno.

“Para sa mas mataas na budget sa edukasyon at ating mga karapatan, patuloy nating kalampagin at paingayin ang ating mga panawagan,” aniya.

Sa huli, dumagsa ang iba pang mag-aaral ng samu’t-saring programa mula sa dalawa pang panig ng unibersidad na nagkasa rin ng lokal na programa. Ikinasa ang malawakang programa sa AS steps sa pangunguna ng USC. Dagdag pa rito, nagbigay suporta ang iba’t-ibang student organizations, advocacy groups, at ilang opisyal ng unibersidad mula sa iba’t-ibang kolehiyo.

Bilang pasasalamat sa mga lumahok, inihayag ni Propesor Danilo Arao ang pagkamangha sa naganap na walkout at Black Friday Protest, aniya, “Bihira lamang magtipon ng ganito karami, inspirasyon ito sa kabataan at nakatatanda. Senyales na ang buhay ng aktibismo ay napakataas pa rin sa ating pamantasan. Huwag maniniwala sa sinumang magmamaliit sa atin.”

“We are now on the right side of history,” tugon nito sa sambayanan.

Bukod sa UP Diliman, UP DEPPO, UP Manila, at UP Tacloban, tinatayang nasa labingtatlong demonstrasyon ang naganap noong Biyernes bilang pakikiisa sa Black Friday Protest. Kaugnay nito, daan-daang mamamayan mula sa iba’t-ibang sektor at organisasyon din ang nagmartsa sa kahabaan ng EDSA Shrine patungong People Power Monument nitong Sabado, Setyembre 13 bilang panawagan din na wakasan na ang paghihirap ng mga Pilipino at panagutin ang lahat ng sangkot sa maanomalyang flood control projects. Sa huli, patuloy ang paglakas ng panawagan para sa mas malawakang protesta na gaganapin sa Setyembre 21, bukas, sa Luneta at sa EDSA Shrine, bilang paggunita sa malagim na kasaysayan ng Batas Militar.