Ngayong umaga isang bubot ng bulaklak
ang ibinigay sa akin ni Munting Kasama
Minamasdan ko ito ngayong
Naaalala ka, Felix
mahal na kaibigan at kasama
at lahat ng magigiting na anak
ng ating bayang nagdurusa
na ang kamatayan ay nagpapatalas sa ating mga punyal
nagbibigay sa ating mga bala
ng mas tiyak na asinta..
Itong busilak na bubot ay tunay na tulad
Ng ating mga martir
Mabagsik ang halimuyak dahil sa pagmamahal
Sa bayan at sambayanan!
Anong rikit pa sana ng kanilang pamumulaklak!
Ngunit ang kalungkutan ay di nararapat na kanilang
Maging bantayog
Kahit buong-lupit na hinagip at hinagupit
Ng mga unos ng pambobomba
Hindi ba’t ang ating lupang Asyano
Ay nagpatuloy sa pagsibol?
Masdan ang ating hanay na kay tapang
Na namukadkad sa bawat puwang.
Nang may tulad na bagsik ng halimuyak at kadalisayan
‘Tayo’y natututong makipaglaban.
